LOAF TIDINGS

കുഞ്ഞു പ്രായത്തിലുള്ള സ്ക്രീൻ എക്സ്പോഷർ

തൻറെ കുഞ്ഞ് മൊബൈൽ കൈകാര്യം ചെയ്യുന്നതിൽ അതിസമർത്ഥനാണ് എന്ന് അഭിമാനത്തോടെ പറയുന്നവരാണ് ഭൂരിഭാഗം മാതാപിതാക്കന്മാരും. തനിക്ക് പോലും മനസ്സിലാകാത്ത കാർട്ടൂണുകളും മറ്റും ശ്രദ്ധയോടെ വളരെ നേരം കുഞ്ഞു കണ്ടിരിക്കുന്നു എന്നും പലരും പറയാറുണ്ട്. എന്നാൽ ഇളം പ്രായത്തിൽ പരിധിയിൽ കൂടുതൽ സ്ക്രീൻ എക്സ്പോഷർ അഭിമുഖീകരിക്കുന്ന കുഞ്ഞുങ്ങൾ നേരിടേണ്ടി വരുന്ന വെല്ലുവിളികളെ കുറിച്ചുള്ള അറിവിൻറെ അഭാവമാണ് പരിധിയില്ലാത്ത മൊബൈൽ ഉപയോഗത്തിന് കുഞ്ഞുങ്ങളെ വിട്ടുകൊടുക്കാൻ ഒരു വലിയ കാരണം. തൻറെ പിഞ്ചു ഭാവനകളുടെ ലോകത്ത് സ്വസ്ഥമായി കുറച്ചുസമയം എങ്കിലും കുഞ്ഞുങ്ങൾ ഇരിക്കേണ്ടത് ഉണ്ട്. ഇത് അവരുടെ സർഗാത്മക വളർച്ചയ്ക്ക് അത്യന്താപേക്ഷിതമാണ്.കൊച്ചുകുട്ടികൾ സ്ക്രീനുകളാൽ നിരന്തരം ഉത്തേജിപ്പിക്കപ്പെടുന്ന അവസ്ഥയിൽ അവർ വിനോദത്തിനായി മൊബൈലിനെ അഥവാ സ്ക്രീനിനെ മുഴുവനായി ആശ്രയിക്കുന്നവരായി വളർന്നുവരികയും അത് അവരുടെ ഭാവനയെയും സർഗാത്മകതയെയും തടസ്സപ്പെടുത്തുകയും ചെയ്യുന്നു. തന്നെയുമല്ല ഒരു വയസ്സിനു താഴെയുള്ള കുഞ്ഞുങ്ങൾ സ്ക്രീനിൽ നിന്നും യാതൊന്നും തന്നെ പഠിക്കുന്നില്ല എന്ന് ശാസ്ത്രലോകം കണ്ടെത്തിയിട്ടുണ്ട്. ലോക ആരോഗ്യ സംഘടന രണ്ടു വയസ്സിൽ താഴെയുള്ള കുഞ്ഞുങ്ങൾക്ക് സ്ക്രീൻ ഒട്ടു തന്നെപാടില്ല എന്ന് നിഷ്കർഷിക്കാനുള്ളള കാരണവും ഇതുതന്നെ. മനുഷ്യസമ്പർക്കത്തിൽ നിന്ന് പഠിക്കേണ്ട അനവധി കാര്യങ്ങൾ ഒരു വയസ്സിന് താഴെയുള്ള കുട്ടികൾക്കുണ്ട്‌. ഈ പ്രായത്തിലുള്ള കുട്ടികൾ അവർക്ക് ചുറ്റുമുള്ള കാര്യങ്ങളോട് വളരെയധികം പ്രതികരിക്കാൻ കഴിവുള്ളവരാണ് . എന്നാൽ പുറമേ നിന്ന് വരുന്ന വാക്കുകളെയും ദൃശ്യങ്ങളെയും സ്വരങ്ങളെയും അപഗ്രഥിക്കുവാനുള്ള സാവകാശം കുഞ്ഞുങ്ങൾക്ക് ലഭിക്കണം. സ്ക്രീനിനു മുന്നിൽ കുട്ടിയെ ഇരുത്തുമ്പോൾ അവർക്ക് ഇത് ചെയ്യുവാനുള്ള സമയം ലഭിക്കാതെ വരുന്നു. ഇപ്രകാരം വാക്കുകളെയും ദൃശ്യങ്ങളെയും സ്വരങ്ങളെയും അപഗ്രഥിക്കുവാനുള്ള സാവകാശം ലഭിക്കാത്തതുകൊണ്ട് ഒരു കാര്യത്തിൽ തന്നെ ശ്രദ്ധിക്കുവാനുള്ള കഴിവ് ഈ കുഞ്ഞുങ്ങൾക്ക് ലഭിക്കുന്നില്ല. കഥാപുസ്തകത്തിൽ നിന്ന് കഥ വായിച്ചു കേൾക്കുന്ന കുട്ടിക്ക് ആകട്ടെ, ഇപ്രകാരം ശ്രദ്ധ കേന്ദ്രീകരിച്ച്, ഭാവനാ ലോകത്തു മുഴുകുവാനുള്ള കഴിവും സമയവും ലഭിക്കുന്നുണ്ട് താനും. ഒപ്പം തന്നെ മറ്റുള്ളവരുടെ മുഖം വായിച്ചെടുക്കുവാനും സാമൂഹ്യപരമായ കഴിവുകൾ വളർത്തിയെടുക്കുവാനും ജീവനും ഓജസും ഉള്ള മനുഷ്യരുമായുള്ള സമ്പർക്കം അത്യാവശ്യമാണ്. ഇളം പ്രായത്തിൽ സ്ക്രീനിന് മുന്നിൽ ചടഞ്ഞു കൂടിയിരിക്കുന്ന കുട്ടിക്ക് ഇപ്രകാരമുള്ള മനുഷ്യസമ്പർക്കത്തിനുള്ള സമയം ലഭിക്കാത്തത് കൊണ്ട്, മറ്റുള്ളവരോടുള്ള പരിഗണന, സഹാനുഭൂതി എന്നിങ്ങനെയുള്ള മൂല്യങ്ങളിൽ വളരുവാൻ ബുദ്ധിമുട്ട് അനുഭവിക്കുന്നവരായി അവർ കാണപ്പെടുന്നു.

വാക്കുകൾക്കപ്പുറമുള്ള ഭാഷ (ശരീര ഭാഷ) മനസ്സിലാക്കുവാൻ "മുഖാമുഖം" ഉള്ള ഇടപെടൽ കുഞ്ഞുങ്ങൾക്ക് അത്യാവശ്യമാണ്. വാക്കുകൾ കൂട്ടി സംസാരിക്കുന്നതിനു മുമ്പുള്ള കാലഘട്ടത്തിൽ കുഞ്ഞുങ്ങൾ മുഖത്തേക്ക് നോക്കുകയും മുഖത്തെ ഭാവങ്ങളിൽ നിന്ന് അർത്ഥം കണ്ടെത്തുകയും ചെയ്യേണ്ടത് അവരുടെ വളർച്ചയ്ക്ക് അത്യന്താപേക്ഷിതമാണ്.

കുഞ്ഞു പ്രായത്തിലുള്ള screen എക്സ്പോഷർ മനുഷ്യൻറെ വികാരങ്ങൾ വായിച്ചെടുക്കുവാനുള്ള കുഞ്ഞുങ്ങളുടെ സ്വാഭാവിക സിദ്ധിയെ പരിമിതപ്പെടുത്തുന്നു. ചുരുക്കി പറഞ്ഞാൽ, ഇളം പ്രായത്തിൽ കുഞ്ഞുങ്ങളെ സ്ക്രീനുകളിൽ നിന്നും പൂർണ്ണമായോ വലിയ ഒരു അളവ് വരെയോ അകറ്റിനിർത്തുന്നത് ജീവിതകാലം മുഴുവൻ അവർക്ക് ഗുണം ചെയ്യുന്നതായി നമുക്ക് മനസ്സിലാക്കുവാൻ സാധിക്കും.