LOAF TIDINGS

വിശുദ്ധ ബൈബിളിൽ പ്രഭാഷകന്റെ പുസ്തകം 25 :1ൽ പറയുന്നതിൻ പ്രകാരം സൃഷ്ടികർത്താവിന്റെ ഹൃദയം ആനന്ദിക്കുന്ന മൂന്നു കാര്യങ്ങളിൽ ഒന്നാണ് ഭാര്യാഭർത്താക്കന്മാർ തമ്മിലുള്ള ലയം. നമുക്കറിയാവുന്നതുപോലെ പഞ്ചസാര ജലത്തിൽ ലയിക്കുന്നു.

എന്നാൽ മണൽത്തരി ജലത്തിൽ ലയിക്കുന്നില്ല. ഭാര്യ ഭർതൃ ബന്ധം എന്നത് പഞ്ചസാര ജലത്തിൽ ലയിക്കുന്ന പോലെ ലയനം സംഭവിക്കേണ്ട ഒരു ബന്ധമാണ്. ഇവിടെ മനുഷ്യ വ്യക്തികൾ എന്ന നിലയ്ക്ക് രണ്ട് പഞ്ചസാര തരികളായ ദമ്പതികൾ ദൈവസ്നേഹമാകുന്ന ജലത്തിൽ ഒന്നിച്ചു ചേരുന്നു. ജലമില്ലാത്തിടത്ത് പഞ്ചസാരത്തരികൾക്ക് ഒന്നിച്ചു ചേരാൻ പ്രയാസമാണ്. അതുകൊണ്ടുതന്നെ ക്രൈസ്തവ ഭാര്യാ ഭർത്താക്കന്മാർ തമ്മിൽ ലയിക്കുന്നതിന് ക്രിസ്തുവിൻ്റെസാന്നിധ്യം അനിവാര്യമാകുന്നു. ക്രിസ്തു സാന്നിധ്യം ഇല്ലാത്തിടത്ത് ലയനം സംഭവിക്കുവാൻ സാധ്യത ഇല്ലാതാകുന്നു. ഇത്തരത്തിൽ ലയനം സാധ്യമാകാത്ത ബന്ധങ്ങൾ കയങ്ങളിൽ ജീവിതം അവസാനിപ്പിക്കേണ്ടി വരുന്നുവെന്നുള്ളതാണ് യാഥാർത്ഥ്യം. ആദ്യ മാതാപിതാക്കളായ ആദത്തെയും ഹവ്വയെയും ദൈവം സൃഷ്ടിച്ചത് ഇത്തരത്തിൽ ഒരു ലയനം ആഗ്രഹിച്ചു കൊണ്ടായിരുന്നുവെന്ന് വിശുദ്ധ ബൈബിളിലെ ഉല്പത്തി പുസ്തകത്തിൽ വിവരിക്കുന്നു. എന്നാൽ പാപം ചെയ്തപ്പോൾദൈവസാന്നിധ്യത്തിൽ നിന്നും ഓടിയകന്ന് പരസ്പരം കുറ്റപ്പെടുത്തിക്കൊണ്ട് ലയമില്ലാതാകുന്നു.

പിന്നീട് പിതാവായ ദൈവം പുത്രനായ ഈശോമിശിഹായെ ലോകത്തിലേക്ക് അയച്ചു കൊണ്ട് കുടുംബത്തിലെ ഭാര്യാഭർത്താക്കന്മാർ തമ്മിലുള്ള ലയനം സാധ്യമാക്കുന്നതായി വിശുദ്ധ യൗസേപ്പിതാവിന്റെയും പരിശുദ്ധ കന്യകാമറിയത്തിന്റെയും പുത്രനായ യേശുവിന്റേയും തിരുക്കുടുംബ ജീവിതം നമുക്ക് സാക്ഷ്യം നൽകുന്നുണ്ട്. ദൈവ സാന്നിധ്യമുള്ളിടത്ത് ലയനം സംഭവ്യമാകുന്നു. അതില്ലാത്തിടത്ത് ജീവിതം കയങ്ങളിൽഹോമിക്കേണ്ടിവരുന്നു. ദൈവസ്നേഹം എന്ന ജലത്തിൽ ലയിക്കുവാൻ പഞ്ചസാര തരികളായ ഭാര്യ ഭർത്താക്കന്മാർക്ക് കഴിയുന്നില്ലെങ്കിൽ കുടുംബജീവിതം ദുഷ്കരമായി തീരുന്നു.

കത്തോലിക്കരായ ദമ്പതികൾക്ക് ദൈവസ്നേഹത്തിന്റെ - ക്രിസ്തു സാന്നിധ്യത്തിൻ്റെ നിറവ് അനുഭവിക്കുവാൻ സാധിക്കുന്ന ഒരു കൂദാശയാണ് വിശുദ്ധ കുർബാന.

അതിനാൽ തന്നെ പ്രത്യാശാനിർഭരമായ കുടുംബജീവിതത്തിന്റെ മനോഹാരിത കാത്തു പരിപാലിക്കുവാനും ദമ്പതികൾ തമ്മിലുള്ള പരസ്പരലയം സാധ്യമാക്കുവാനും അനുദിന വിശുദ്ധ കുർബാന സ്വീകരണം നമ്മുടെ കുടുംബജീവിതത്തിന്റെ ഭാഗമായിത്തീരട്ടെയെന്ന് പ്രത്യാശിക്കുന്നു.