LOAF TIDINGS

ജീവന്റെ കാവൽക്കാർ

"ജീവന്റെ സുവിശേഷം യേശു നൽകുന്ന സന്ദേശത്തിന്റെ കേന്ദ്ര സ്ഥാനത്ത് നിലകൊള്ളുന്നു. ഓരോ ദിവസവും സഭ അതു സ്നേഹപൂർവ്വം സ്വീകരിക്കുകയും ഓരോ കാലഘട്ടത്തിലേയും ഓരോ സംസ്കാരത്തിലെയും ജനങ്ങളോട് സദ്വാർത്ത എന്ന നിലയിൽ കർശനമായ വിശ്വസ്തതയോടെ അത് പ്രഘോഷിക്കുകയും വേണം" ( ജോൺപോൾ രണ്ടാമൻ, ജീവന്റെ സുവിശേഷം )

വിശ്വസാഹിത്യത്തിലെ അതുല്യ പ്രതിഭ ഖലിൽ ജിബ്രാൻ എഴുതിയ വരികൾ ഒന്ന് ശ്രദ്ധിക്കാം "One day you will ask me which is more important? My life or yours? I will say mine and you will walk away not knowing that you are my life."(Khalil Gibran)

ജിബ്രാൻ എന്ന പേര് വിശ്വസാഹിത്യത്തിലെ ഒരു അനന്യമായ നാമമാണ്. ഈ ലബനീസ് കവിയുടെ തൂലികയിൽ നിന്ന് ഉതിർന്ന മുകളിൽ ഉദ്ധരിച്ച വാക്കുകൾ, പറയാൻ ശ്രമിക്കുന്നത് യഥാർത്ഥത്തിൽ, ആഴമുള്ള പ്രണയത്തിൻ്റെ ആത്മീയതയെ കുറിച്ചാണ്. എന്നാൽ ഈ പറയുന്നത്ര ആഴത്തിൽ ഒരു മനുഷ്യന് മറ്റൊരാളെ പ്രണയിക്കാനോ, ആ വ്യക്തിയായി രൂപാന്തരപ്പെടാനോ ആവില്ലെന്നത് കാലം തെളിയിച്ച, ഏവർക്കുമറിയാവുന്ന വാസ്തവവുമാണ്.

ഈ കാല്പനികത കലർന്ന കവിഭാവന നമ്മെ മറ്റൊന്ന് ഓർമ്മിപ്പിക്കുന്നുണ്ട് . 'you are my life ' എന്നു പറഞ്ഞ് ഒരാളെ സംവഹിച്ച് മറ്റൊരാളായി മാറുന്ന ആ മാന്ത്രികത ഓരോ കുഞ്ഞുങ്ങളെ സംവഹിക്കുന്ന അമ്മമാരിലും നമുക്ക് കാണാനാവും. മാതൃസ്നേഹത്തെ വെറുതെ ധ്യാനിച്ച്, ഒരമ്മയുടെ ത്യാഗത്തിൻ്റെ സ്മരണയിൽ ജിബ്രാൻ്റെ വരികൾ വായിക്കുമ്പോൾ അവ കൂടുതൽ അർത്ഥഗർഭമായി മാറുന്നതായി കാണാം. ശരിയാണ് ഒരു നാൾ ഓരോ കുഞ്ഞും തിരിച്ചറിയുന്നുണ്ട് 'ഓരോ അമ്മമാർക്കും കൂടുതൽ വിലപ്പെട്ടത് അവരുടെ ഉള്ളിൽ തുടിക്കുന്ന കുരുന്ന് ജീവനാണ് എന്ന്. ഈയടുത്ത നാളുകളിൽ സപ്ന ട്രേസി എന്ന ഒരു അമ്മയുടെ ഇത്തരം ത്യാഗജീവിതത്തിൻ്റെ നേർക്കാഴ്ച 'അമ്മ മാലാഖ' എന്ന പുസ്തകമായി പുറത്തിറക്കിയിട്ടുണ്ട്. ഏവരും വായിച്ചിരിക്കേണ്ട ഒരു നല്ലപുസ്തകം, (പ്രസാധനം: ലോഫ്, കാർമ്മൽ ഇന്റർനാഷണൽ) നാല്പത്തി മൂന്നാം വയസ്സിൽ എട്ടാമത്തെ കുഞ്ഞിന് വേണ്ടിയായിരുന്നു ആ സമർപ്പണം. സ്വന്തം ജീവൻ ഒരു നൈവേദ്യമായി ദൈവത്തിൽ ശരണപ്പെട്ട് ഒരമ്മ സമർപ്പിക്കുകയാണ്. തന്നെ വിഴുങ്ങാനൊരുങ്ങുന്ന കാൻസർ എന്ന ഭീകരനെ നോക്കി പുഞ്ചിരിച്ചു കൊണ്ട്. സ്വയം നിലത്തു വീണഴിഞ്ഞ് ആ ഗോതമ്പുമണി മറ്റൊരു ജീവനെ ലോകത്തിനു സമ്മാനിക്കുകയായിരുന്നു. ആ അമ്മയുടെ ദീപ്തമായ സ്മരണ അവർ ജന്മം നൽകിയ മക്കൾക്കും ജീവിതപങ്കാളിക്കുമൊക്കെ എത്രയോ അമൂല്യമെന്ന് തൊട്ടറിയാൻ കഴിയുന്ന നിമിഷങ്ങളായിരുന്നു ആ പുസ്തക പ്രകാശന വേള.

സ്നേഹവും മാതൃത്വവുമൊക്കെ കോംപ്രമൈസ് ചെയ്യപ്പെടുന്ന ഒരു കാലത്താണ് നാമിന്ന് ജീവിക്കുന്നത്. സഹോദരൻ്റെ രക്തം കുടിക്കാൻ വാ പിളർന്ന ഭൂമിയിൽ ശപിക്കപ്പെട്ട കായേൻമാരായി ജീവിച്ചു തീർക്കുന്ന തലമുറയെ തൊട്ടുണർത്താനാണ് ചില അമ്മ മാലാഖമാരുടെ ജീവിതം നമുക്കു മുമ്പിൽ അനാവൃതമാകുന്നത്.

ജീവൻ്റെ മൂല്യത്തെ മുറുകെ പിടിക്കാനും മറ്റു ജനതകളോടും തലമുറകളോടും പങ്കുവയ്ക്കാനും, പ്രഘോഷിക്കാനും നമുക്ക് ബാധ്യതയുണ്ട്. ജീവൻ്റെ സുവിശേഷമെന്ന ചാക്രിക ലേഖനത്തിൽ വിശുദ്ധ ജോൺപോൾ രണ്ടാമൻ ലോകത്തെ ഓർമ്മിപ്പിക്കുന്ന ഈ യാഥാർത്ഥ്യം പുരമുകളിൽ നിന്ന് പ്രഘോഷിക്കപ്പെടേണ്ട ഒന്നാണ്. ''ഓരോ വ്യക്തിയോടും ദൈവത്തിൻ്റെ നാമത്തിൽ നിർബന്ധപൂർവ്വം നടത്തുന്ന ഒരു അപേക്ഷയാണ് : ജീവനെ - ഓരോ മനുഷ്യ ജീവനെയും ബഹുമാനിക്കുക, സംരക്ഷിക്കുക, സ്നേഹിക്കുക, ശുശ്രൂഷിക്കുക. ഈ ദിശയിൽ മാത്രമേ നിങ്ങൾ നീതിയും വികസനവും യഥാർത്ഥ സ്വാതന്ത്ര്യവും, സമാധാനവും സന്തോഷവും കണ്ടുമുട്ടുകയുള്ളൂ.”

സമസ്ത ലോകത്തിനും സുഖം വരാനുള്ള ഏകമാർഗ്ഗം ജീവൻ്റെ സുവിശേഷത്തിൻ്റേതാണെന്ന് മറക്കാതിരിക്കാം.