LOAF TIDINGS

ദൈവം സ്നേഹമാകുന്നു. പുരുഷന്റെയും സ്ത്രീയുടെയും മനുഷ്യ സ്വഭാവത്തെ തന്റെ ഛായയിൽ സൃഷ്ടിച്ചുകൊണ്ട് ദൈവം അവരിൽ സ്നേഹത്തിന്റെയും സംസർഗ്ഗത്തിന്റെയും വിളിയും അതിനുള്ള കഴിവും ഉത്തരവാദിത്വവും ഉല്ലേഖനം ചെയ്തു.

ദൈവം മനുഷ്യനെ തന്റെ ഛായയിൽ സൃഷ്ടിച്ചു. പുരുഷനും സ്ത്രീയുമായി അവരെ സൃഷ്ടിച്ചു. അവരെ അനുഗ്രഹിച്ചു കൊണ്ട് അവിടുന്ന് പറഞ്ഞു. സന്താനപുഷ്ടിയുള്ളവരായി പെരുകുവിൻ. ഛായയിലു൦ സാദൃശ്യത്തിലും ആയിരിക്കുക എന്നാൽ പുത്രനായിരിക്കുക, മക്കളായിരിക്കുക എന്നാണ്. ദൈവമക്കളുടെ സ്ഥാനം നൽകി സൃഷ്ടിച്ചു എന്ന് മനസ്സിലാക്കുന്നതായിരിക്കും ഉത്തമം. ഈശോ തന്നെ ദൈവത്തെ പിതാവ് എന്ന് വിളിക്കാൻ പഠിപ്പിച്ചിട്ടുണ്ട് .

മനുഷ്യന് ദൈവം നൽകുന്ന ഉത്തരവാദിത്വം

ദൈവം മനുഷ്യന് എല്ലാ ജീവജാലങ്ങളുടെയും മേൽ ആധിപത്യം നൽകിയിട്ടുണ്ട്. ഇത് സൂചിപ്പിക്കുന്നത് മനുഷ്യനുള്ള രാജകീയമായ ദൗത്യമാണ്. രാജാവിനുള്ള ആധിപത്യം തന്റെ അജഗണത്തെ സംരക്ഷിക്കുക, അവർക്ക് ആവശ്യമായത് നൽകുക, അവരെ തിന്മയിൽ നിന്ന് സംരക്ഷിക്കുക എന്നതാണ് .

ഗർഭഛിദ്രം

മനുഷ്യജീവൻ ഗർഭധാരണത്തിന്റെ നിമിഷം മുതൽ ആദരിക്കപ്പെടുകയും നിരുപാധികമായി സംരക്ഷിക്കപ്പെടുകയും വേണം. ഗർഭധാരണത്തിന്റെ ആദ്യ നിമിഷം മുതൽ മനുഷ്യജീവി ഒരു വ്യക്തിയുടെ അവകാശങ്ങൾ ഉള്ളവനായി അംഗീകരിക്കപ്പെടണം. മനപ്പൂർവം നടത്തുന്ന ഗർഭഛിദ്ര൦ ധാർമിക തിന്മയാണെന്ന് സഭ ആദിമ നൂറ്റാണ്ടു മുതൽ പഠിപ്പിക്കുന്നു. ജീവൻ സംരക്ഷിക്കുക എന്ന മഹനീയ ദൗത്യം ജീവന്റെ നാഥനായ ദൈവം മനുഷ്യർക്ക് നൽകിയിരിക്കുന്നു.

ദയാവധം

മരണം ആസന്നമെന്ന് തോന്നിയാലും ഒരു രോഗിക്ക് നൽകേണ്ട സാധാരണ പരിചരണം നിഷേധിക്കുന്നത് ശരിയല്ല ജീവിതത്തിൽ ബലക്ഷയവും രോഗങ്ങളും ഉള്ളവർ പ്രത്യേക ബഹുമാനം അർഹിക്കുന്നു. കഴിയുന്നിടത്തോളം സാധാരണ ജീവിതം നയിക്കുവാൻ രോഗികളെ സഹായിക്കണം.

ഭാര്യഭർതൃ സ്നേഹവും ഫലദായകത്വവും

പുരുഷനും സ്ത്രീയും തമ്മിലുള്ള ദാമ്പത്യ സ്നേഹത്തെയാണ് ലൈംഗികത ഉന്ന൦ വയ്ക്കുന്നത്. വിവാഹത്തിൽ ഫലദായകത്വം ഒരു ദാനമാണ്. ദാമ്പത്യ സ്നേഹം സ്വാഭാവികമായി സന്താനോൽപ്പാദനത്തിലേക്ക് നയിക്കുന്നു. ഒരു കുഞ്ഞു ജനിക്കുമ്പോൾ ദമ്പതികളുടെ പരസ്പര സ്നേഹത്തിലേക്ക് പുറമേനിന്ന് കൂട്ടിച്ചേർക്കപ്പെടുന്നതല്ല മറിച്ച് പരസ്പരദാനത്തിന്റെ ഫലമായി ഉടലെടുക്കുന്നതാണ്.

ജീവൻ നൽകാൻ വിളിക്കപ്പെട്ടിരിക്കുന്ന ദമ്പതികൾ ദൈവത്തിന്റെ സൃഷ്ടികർമ്മത്തിൽ പങ്കുചേരുന്നു. ജീവൻ പകരുന്നതും കുഞ്ഞുങ്ങൾക്ക് വിദ്യാഭ്യാസം നൽകുന്നതും തങ്ങളുടെ ദൗത്യമായി ദമ്പതികൾ കരുതണം.

അങ്ങനെ സൃഷ്ടാവായ ദൈവത്തിന്റെ സ്നേഹത്തിൽ സഹകരിക്കുകയാണെന്ന് എന്നത് ദമ്പതികൾ മനസ്സിലാക്കണം. നിർദിഷ്ട കാലത്തെ സ൦യമനം അതായത് ഗർഭധാരണക്ഷമമല്ലാത്ത കാലത്തിന്റെ വിനിയോഗം അടിസ്ഥാനമാക്കിയുള്ള സന്താനോല്പാദന ക്രമീകരണ മാർഗങ്ങൾ ധാർമികതയുള്ളതാണ്. ഈ മാർഗങ്ങൾ ദമ്പതികളുടെ ശരീരത്തോട് ആദരവ് കാട്ടുകയാണ് ചെയ്യുന്നത്. നേരെമറിച്ച് ദാമ്പത്യ പ്രവർത്തിക്കു മുമ്പോ അതിന്റെ പൂർത്തീകരണത്തിലോ അല്ലെങ്കിൽ അതിന്റെ സ്വാഭാവികമായ അനന്തരഫലങ്ങളുടെ വികസനത്തിലോ, സന്താനോൽപ്പാദനം അസാധ്യമാക്കുന്ന ഏതൊരു പ്രവർത്തിയും തിന്മയാണ് .

മക്കൾ ദൈവദാനം

പുകുഞ്ഞ് ആരുടെയും അവകാശമല്ല ദാനമാണ്. വിവാഹത്തിലെ പരമമായ ദാനം. തന്റെ മാതാപിതാക്കളുടെ ദാമ്പത്യ സ്നേഹത്തിന്റെ ഫലമായിരിക്കാനും ഗർഭധാരണത്തിന്റെ നിമിഷം മുതൽ ഒരു വ്യക്തിയായി ആദരിക്കപ്പെടാനും കുഞ്ഞിന് അവകാശമുണ്ട് .ന്യായമായ എല്ലാ വൈദ്യശാസ്ത്ര പ്രതിവിധികളും തേടിയിട്ടും വന്ധ്യതയ്ക്ക് പരിഹാരം കാണാത്ത ദമ്പതികൾ എല്ലാത്തിന്റെയും ഉടയവനായ കർത്താവിന്റെ കുരിശിനോട് തങ്ങളെ തന്നെ ഐക്യപ്പെടുത്തേണ്ടതാണ്. അനാഥരായ കുട്ടികളെ ദത്തെടുത്ത് തങ്ങളുടെ ഉദാരത പ്രകടിപ്പിക്കാം.

മനുഷ്യജീവൻ അതിന്റെ ആരംഭം മുതൽ ദൈവത്തിന്റെ സൃഷ്ടിപരമായ പ്രവർത്തനം ഉൾക്കൊള്ളുന്നതുകൊണ്ടും സൃഷ്ടാവുമായുള്ള സവിശേഷ ബന്ധത്തിൽ നിലനിൽക്കുന്നത് കൊണ്ടും പാവനമാണ്. ദൈവം മാത്രമാണ് ജീവന്റെ ആരംഭം മുതൽ അവസാനം വരെ അതിന്റെ ഉടയവൻ. നിരപരാധിയായ ഒരു മനുഷ്യജീവിയെ നശിപ്പിക്കാൻ ആർക്കും യാതൊരു സാഹചര്യത്തിലും അവകാശമില്ല ......