LOAF TIDINGS

ക്രിസ്റ്റഫർ --- ക്രിസ്തു സംവാഹകനായ മകൻ

വിവാഹം കഴിഞ്ഞ നാളുകൾ........

ജോലി സംബന്ധമായി ഞാൻ കോയമ്പത്തൂരിലേക്ക് ട്രാൻസ്ഫർ ആയ സമയം,,,,,, പുതിയ ബാങ്കും പുതിയ ജോലിയുമായി ഞാൻ പതുക്കെ പൊരുത്തപ്പെട്ട് വരുമ്പോഴാണ് അമ്മയുടെ മരണം. അമ്മയുടെ മരണശേഷം വീട്ടിലെ കാര്യങ്ങൾ ക്രമീകരിക്കപ്പെട്ടു വരുന്നു. ഭാര്യയുടെ പ്രെഗ്നൻസി ചെക്ക് അപ്പിനു വേണ്ട ക്രമീകരണങ്ങൾ കഴിഞ്ഞാണ് ജോലി സ്ഥലത്തേക്ക് ഞാൻ പോയത്. പിറ്റേന്ന് ജോലി സ്ഥലത്തു ഇരിക്കുമ്പോൾ ഫോൺ കോൾ കിട്ടി. അതായതു ഹിമക്ക് സീരിയസ് ആയതു കൊണ്ടു വേഗം നാട്ടിലേക്ക് വരണം.

ഞാൻ ഉടനെ ഹോസ്പിറ്റലിലേക്ക് വിളിച്ചു. കാര്യങ്ങൾ അന്വേഷിച്ചു. ഫ്ലൂയിഡിൻെറ കുറവ് മൂലം ഹിമയുടെ പ്രസവത്തിന് ബുദ്ധിമുട്ട് ഉണ്ടാകുമെന്നും, കുഞ്ഞിന് കാര്യമായ ബുദ്ധിമുട്ടുകൾ ഉണ്ടാകും എന്നും ഹിമയെ ചികിത്സിച്ചിരുന്ന ഡോക്ടർ ബിന്ദു എന്നോട് സംസാരിച്ചു.

ഈ സമയം അവർ എല്ലാവരും ജൂബിലി മിഷൻ ഹോസ്പിറ്റലിലെ ദേവാലയത്തിൽ ദിവ്യകാരുണ്യ സന്നിധിയിൽ ഇരുന്ന് അമ്മയ്ക്കും കുഞ്ഞിനും വേണ്ടി പ്രാർത്ഥിച്ചു. ഞാൻ കോയമ്പത്തൂരിൽ നിന്ന് ഉടനെ പുറപ്പെട്ടു ഹോസ്പിറ്റലിൽ എത്തി. യാത്രയിൽ ഉടനീളം ദൈവത്തോട് ഭാര്യക്കും കുഞ്ഞിനും വേണ്ടി മുട്ടിപ്പായി പ്രാർത്ഥിച്ചു. പരിശുദ്ധാത്മാവിൻെറ ഒരു സ്വരം എനിക്ക് ലഭിച്ചു. കുഞ്ഞ് ആൺകുഞ്ഞ് ആയിരിക്കുമെന്നും കുഞ്ഞിന് *ക്രിസ്റ്റഫർ* എന്ന പേരിടാനും നിർദ്ദേശിച്ചു യാതൊരു അപകടങ്ങളും കൂടാതെ ഭാര്യ പ്രസവിക്കുമെന്നും കുഞ്ഞ് ഉന്മേഷവാനായിരിക്കുമെന്നും കർത്താവിൻെറ ആത്മാവ് എനിക്ക് ഉറപ്പു നൽകി.

ഞാൻ ഹോസ്പിറ്റലിൽ എത്തുമ്പോഴേക്കും ഭാര്യയുടെ പ്രസവം നടന്നിരുന്നു. അമ്മയെ മുറിയിലേക്കും കുഞ്ഞിനെ ഇൻക്യുബേറ്ററിലേക്കും മാറ്റിയിരുന്നു.

അടുത്ത ദിവസം കുട്ടികളെ പരിചരിക്കുന്ന ഡോക്ടർ സജീവൻ കുഞ്ഞിന് യാതൊരു കുഴപ്പങ്ങളും ഇല്ല എന്നും ശരീരഭാരം പതിയെ മെച്ചപ്പെടുമെന്നും അറിയിച്ചു. തുടർന്ന് ഒരു മാസക്കാലം ഹോസ്പിറ്റലിലെ പരിചരണത്തിന് ശേഷം അമ്മയും കുഞ്ഞും ദൈവാനുഗ്രഹത്താൽ വീട്ടിലെത്തി.

പരിശുദ്ധാത്മാവിൻെറ നിർദ്ദേശപ്രകാരം മാമോദിസയിൽ ‘ക്രിസ്റ്റഫർ’ എന്ന് പേര് നൽകുകയും ചെയ്തു.

... പേജ് -3ൽ നിന്നും

പരിശുദ്ധ കത്തോലിക്കാ സഭയുടെ സമ്പത്തും പവർഹൗസും വിശുദ്ധ കുർബാനയാണ്. ഇത് വയലിൽ ഒളിപ്പിച്ചുവെച്ച നിധിക്ക് സമാനമാണ്. ആ നിധി കണ്ടെത്താനാകുക ജന്മസൗഭാഗ്യവും. തിരുസഭയിലെ വിശുദ്ധർ മരണം വരെ വിശുദ്ധിയിൽ നിലനിന്നത് വിശുദ്ധ കുർബാന നൽകിയ ശക്തി സ്വീകരിച്ചുകൊണ്ടാണ്. സിയന്നായില വിശുദ്ധ കാതറിൻ മാസങ്ങളോളം വിശുദ്ധ കുർബാന മാത്രം ഭക്ഷിച്ച് ജീവിച്ചു. ഭക്ഷണം കഴിക്കാൻ നിർബന്ധിതയായപ്പോഴൊക്കെ അവൾ രോഗിണിയായി. എന്നാൽ വിശുദ്ധ കുർബാന മാത്രം സ്വീകരിച്ചപ്പോൾ ആരോഗ്യവതിയും പ്രസന്നവതിയുമായി കാണപ്പെട്ടു. 2004 ഏപ്രിൽ 26ന് വിശുദ്ധ ജോൺപോൾ രണ്ടാമൻ മാർപാപ്പ വാഴ്ത്തപ്പെട്ടവൾ എന്ന് നാമകരണം ചെയ്ത വാഴ്ത്തപ്പെട്ട അലക്സാണ്ട്രിന അവളുടെ ജീവിതത്തിൻെറ അവസാന 13 വർഷങ്ങൾ വിശുദ്ധ കുർബാന മാത്രം ഉൾക്കൊണ്ടാണ് ജീവിച്ചത്. അതെ നമ്മുടെ ജീവിത സഹനങ്ങൾക്കു മീതെ ചവിട്ടി നിൽക്കാൻ ഉൾക്കരുത്ത് പകരുന്നത് അവൻ്റെ സ്നേഹ ചൂടിൽ ചുട്ടെടുത്ത ഈ അപ്പമാണ്. വേദനിക്കുന്നവരിൽ യേശുവിൻെറ തിരുമുഖം കണ്ട് ത്യാഗോജ്വലമായ പരസ്നേഹ പ്രവർത്തനങ്ങൾ ചെയ്യാൻ അനേകർക്ക് ഊർജ്ജം പകരുന്നത് വിശുദ്ധ കുർബാനയാണ്. ഓടയിൽ പുഴുവരിച്ച് കിടന്നവനിൽ യേശുവിനെ കാണാൻ മദർ തെരേസക്ക് മിഴി തുറന്നു കൊടുത്തത് ഈ വിശുദ്ധ കുർബാന തന്നെ. ഭീകരപ്രവർത്തനങ്ങളും യുദ്ധങ്ങളും നടമാടുന്ന രാജ്യങ്ങളിലും മിഷണറീസ് ഓഫ് ചാരിറ്റിയുടെ സേവനങ്ങൾ നൽകാൻ മദർ തയ്യാറായിരുന്നു. അനുദിനം വിശുദ്ധ ബലി അർപ്പിക്കാനുള്ള സാഹചര്യവും ഒരു വൈദികനേയും അനുവദിക്കുക എന്നതു മാത്രമാണ് അവിടുത്തെ ഭരണാധികാരികളോട് മദർ ആവശ്യപ്പെട്ടത്. ഒരിക്കൽ ഒരു മുസ്ലിം ഭരണാധികാരിയോട് മദർ പറഞ്ഞു "We live because of Christ and Christ lives because of a priest." പരിശുദ്ധ ഫ്രാൻസിസ് മാർപാപ്പ പറയുന്നതുപോലെ ഓരോ വിശുദ്ധ കുർബാന അർപ്പണവും ഉത്ഥിതനായ കർത്താവിനെ കണ്ടുമുട്ടലാണ്.

തേനിൻെറ മാധുര്യം എങ്ങനെയാണെന്ന് ആരാഞ്ഞാൽ എന്താണ് നാം പറയുക? കാരണം അത് രുചിയുടെ ഒരു അനുഭവമാണ്. ഓരോ വിശുദ്ധ കുർബാനയും കഴിയുമ്പോൾ അവൻറെ സ്നേഹത്തിൻെറ പുഴയിൽ ഒന്ന് മുങ്ങി കുളിച്ചു കയറി വരുന്ന സുഖമാണ്. ബലം ക്ഷയിച്ചുകൊണ്ടിരിക്കുന്ന ഇടംകയ്യാൽ കുട പിടിച്ചും വേദനിയ്ക്കുന്ന വലംകൈയ്യാൽ വീൽ ചെയർ നിയന്ത്രിച്ചും ഏതു മഴയത്തും വെയിലത്തും തേടിയിറങ്ങുന്നത് ഈ സ്നേഹ നദിയിൽ ഒന്ന് കുളിച്ചു കയറാനാണ്. പാടുപീഡകളുടെ നേരത്തും പ്രാണൻ പകുത്തു നൽകിയ അവനുവേണ്ടി ഒരു കൊച്ചു സക്രാരി നമ്മുടെ ശരീരമാകുന്ന ദേവാലയത്തിലും ഒരുക്കി വയ്ക്കാം. അവിടെ അവനോടുള്ള സ്നേഹത്തിന്റെ ഒരു കൊച്ചു കെടാവിളക്ക് സദാ ജ്വലിച്ചു നിൽക്കട്ടെ !

അവർണ്ണനീയമായ ഈ ദാനത്തെക്കുറിച്ച് കർത്താവേ അങ്ങേയ്ക്ക് സ്തുതി !!!