LOAF TIDINGS

മകനെ ജീവിതകാലം മുഴുവൻ നമ്മുടെ ദൈവമായ കർത്താവിനെ ഓർക്കുക ഒരിക്കലും പാപം ചെയ്യുകയോ അവിടുത്തെ കൽപ്പനകൾ ലംഘിക്കുകയോ അരുത്. ജീവിതകാലം മുഴുവൻ നിന്റെ പ്രവൃത്തികൾ നീതിനിഷ്ഠമായിരിക്കട്ടെ! (തോബിത് 4:5)

കുടുംബ ജീവിതത്തെക്കുറിച്ചും ദാമ്പത്യ വിശുദ്ധിയെ കുറിച്ചും, പ്രതിസന്ധികൾ നേരിടാൻ മക്കളെ പ്രാപ്തരാക്കുന്നതിനെക്കുറിച്ചും, വ്യക്തമായി പറയുന്ന തിരുവചന ഭാഗമാണ് തോബിത്തിൻ്റെ പുസ്തകം. അന്ധനായ തോബിത് മേദിയായിലെ റാഗെസിൽ വച്ച് ഗബായേലിന്റെ പക്കൽ സൂക്ഷിക്കാൻ ഏൽപ്പിച്ച പണം വാങ്ങാൻ മകൻ തോബിയാസിനെ അയക്കുന്നതിന് മുൻപ് നൽകിയ നിർദ്ദേശങ്ങളിലെ ഒരു പ്രധാന ഭാഗമാണ് മുകളിൽ കൊടുത്തിരിക്കുന്ന തിരുവചന ഭാഗം.

ഒരിക്കൽ ഒരു കർഷകൻ ദൈവത്തോട് പ്രാർത്ഥിച്ചു. ദൈവം അവന്റെ മുമ്പിൽ വന്ന് എന്ത് വരമാണ് വേണ്ടത് എന്ന് ചോദിച്ചു. കൃഷിയെക്കുറിച്ച് ശരിയായി അറിയുന്ന എനിക്ക് കാറ്റ്, മഴ എന്നിവയെ നിയന്ത്രിക്കാനുള്ള വരം തരണം എന്ന് ആവശ്യപ്പെട്ടു. അല്പം വിഷമത്തോടെയാണെങ്കിലും ദൈവം ആവശ്യം അംഗീകരിച്ചു. കാറ്റും മഴയും കർഷകനെ അനുസരിച്ച് കൃഷിയെ സഹായിച്ചു. കൃഷി സ്ഥലം വളരെ മനോഹരമായിത്തീർന്നു. കൊയ്ത്തുകാലം വന്നു. നെൽക്കതിർ കൊയ്തെടുത്ത കർഷകൻ ആകെ വിഷമത്തിലായി. അതിൽ ധാന്യം ഉണ്ടായിരുന്നില്ല. അയാൾ ദൈവത്തോട് ദേഷ്യപ്പെട്ടു. ഞാനെല്ലാം കൃത്യമായാണ് ചെയ്തത്, എന്നിട്ടും എന്തുകൊണ്ടാണ് എനിക്ക് നല്ല വിളവ് ലഭിക്കാതിരുന്നത്. അപ്പോൾ ദൈവം കർഷകനോട് പറഞ്ഞു: എൻ്റെ നിയന്ത്രണത്തിൽ ആയിരുന്നപ്പോൾ കാറ്റ് സസ്യങ്ങളുടെ വേരുകളെ ആഴത്തിലേക്ക് ഇറക്കുകയും മഴ കുറയുമ്പോൾ വെള്ളം അന്വേഷിച്ച് വേരുകൾ പല വശങ്ങളിലേക്ക് വളരുകയും ചെയ്യുമായിരുന്നു.

പ്രതിസന്ധികൾ ഉണ്ടെങ്കിലേ തങ്ങളുടെ ശക്തി മുഴുവൻ ഉപയോഗിക്കുകയുള്ളൂ. എല്ലാ സൗകര്യവും ചെയ്തു കൊടുത്തപ്പോൾ സസ്യങ്ങൾ മടിയന്മാരായിത്തീർന്നു. സമൃദ്ധമായി വളർന്നെങ്കിലും ധാന്യമണികൾ നൽകാൻ അവർക്ക് സാധിച്ചില്ല. നമ്മുടെ മക്കളിൽ പ്രതിസന്ധികളും പരാജയങ്ങളും സംഭവിക്കുമ്പോൾ മാത്രമാണ് അവരുടെ ശരിയായ കഴിവ് പുറത്തുവരികയുള്ളൂ. എല്ലാ സുഖസൗകര്യങ്ങളും ഇഷ്ടാനുസരണം നൽകിയാൽ കതിർ മാത്രം ഉണ്ടാകും, ധാന്യം ലഭിക്കുകയില്ല.

കുഞ്ഞുന്നാളിൽ നെറ്റിയിൽ വരയ്ക്കുന്ന കുരിശടയാളം മുതൽ അവർ സ്വീകരിക്കുന്ന കൂദാശകൾ ഓരോന്നും അവരെ കൃപാവരത്തിൽ വളർത്തുന്നു. രണ്ടു വരയും നാലു വരയും എഴുതിക്കൊടുക്കുന്ന, ഹോംവർക്ക് ചെയ്തുകൊടുക്കുന്ന , പ്രോജക്ടുകളും അസൈൻമെന്റുകളും ഏറ്റെടുക്കുന്ന, പ്രിയ മാതാപിതാക്കളെ നിങ്ങൾ നിങ്ങളുടെ കുഞ്ഞുങ്ങളെ ധാന്യമില്ലാത്ത കതിരുകൾ ആക്കുകയാണ് ചെയ്യുന്നത്. പ്രശ്നങ്ങളും വെല്ലുവിളികളും തോൽവികളും നേരിടാൻ മക്കളെ പരിശീലിപ്പിക്കാം. അവരുടെ പ്രതിസന്ധികളിൽ ദിശാബോധം നൽകി നല്ല തീരുമാനങ്ങളിലേക്ക് നയിക്കാൻ അവരെ പരിശീലിപ്പിക്കാം. ദൈവത്തോട് വിശ്വസ്തരായി അവരെ വളർത്താം. അങ്ങനെ നമുക്ക് ദൈവത്തിന്റെ പരിശീലകരാകാം. ദൈവം നിങ്ങളെ സമൃദ്ധമായി അനുഗ്രഹിക്കട്ടെ.