LOAF TIDINGS

പ്രകാശം പരത്തുന്ന പ്രാർത്ഥനകൾ

പുറപ്പാടിൻ്റെ പുസ്തകത്തിലാണ് ഒരു വീടിൻ്റെ സുരക്ഷക്ക് ദൈവം നിർദ്ദേശിക്കുന്ന ഇക്കാര്യം നാം കാണുന്നത്.

"കട്ടിളയിലുള്ള രക്‌തം നിങ്ങള്‍ ആ വീട്ടില്‍ താമസിക്കുന്നുവെന്നതിന്റെ അടയാളമായിരിക്കും. അതു കാണുമ്പോള്‍ ഞാന്‍ നിങ്ങളെ കടന്നുപോകും. ഞാന്‍ ഈജിപ്‌തിനെ പ്രഹരിക്കുമ്പോള്‍ ആ ശിക്‌ഷ നിങ്ങളെ ബാധിക്കുകയില്ല. (പുറപ്പാട്‌ 12 : 13 )

നമ്മുടെ വീട്ടകങ്ങളെ, ഉള്ളിൽ വസിക്കുന്നവരെ കാത്തു സംരക്ഷിച്ചിരുന്നത് കട്ടിളയിലെ കുഞ്ഞാടിൻ്റെ രക്ത തുള്ളികളായിരുന്നു. മറ്റൊരർത്ഥത്തിൽ പ്രാർത്ഥന കൊണ്ട് നാം തീർത്തിരുന്ന രക്ഷാകവചങ്ങൾ. എല്ലാ കാലത്തും വിവിധങ്ങളായ പ്രഹരങ്ങൾ വീടിനേയും നാടിനേയും പിടിച്ചുകുലുക്കിയിരുന്നു. പക്ഷേ അത് നേരിടാൻ ഒരു കൃപയുടെ സംരക്ഷണ മുദ്ര നമുക്കുണ്ടായിരുന്നു. എന്നിട്ടും എങ്ങിനെയാണ് നമ്മുടെ വീടുകളിൽ ഇന്ന് ഇരുട്ടിന് കനം വയ്ക്കുന്നത്. ഒരു ആത്മീയ ഗ്രന്ഥത്തിൽ വായിച്ചതാണ് ഈ വരികൾ "സന്ധ്യകളിൽ ജപമണികൾ ഉരുളാത്ത വീടുകളും, വിരുന്നു മേശകളിൽ സല്ലാപങ്ങൾ ഇല്ലാതായ ഭവനങ്ങളും, മുറ്റത്ത് കുട്ടികളുടെ കളിചിരികൾ ഇല്ലാതാകുന്ന, അകത്തെ മുറിയിൽ വൃദ്ധരുടെ സാന്നിദ്ധ്യമില്ലാത്ത ഭവനങ്ങളുമൊക്കെ ഒരു തരം സൂചനയാണത്രെ! വീട് ഇരുളാൻ തുടങ്ങുന്നതിൻ്റെ സൂചന!

എത്ര പെട്ടെന്നാണ് വീടിന് പരിണാമം സംഭവിച്ചത്. നമ്മളെ നമ്മളല്ലാതാക്കുന്ന ഡിജിറ്റൽ ലോകത്തിൻ്റെ തടവറയിലും, നിയന്ത്രണത്തിലും നമ്മുടെ വീടുകൾ ജപമണികളുരുളാത്ത, കുഞ്ഞുങ്ങളുടെ പൊട്ടിച്ചിരിയില്ലാത്ത, ഊട്ടു മേശയുടെ ഊഷ്മളത നഷ്ട്ടമായ ഏകാന്തതയുടെ തുരുത്തുകളായി മാറിയിരിക്കുന്നു. ഇരുട്ട് ബാധിച്ചിരിക്കുന്ന വീടുകളിൽ നിന്ന് മൂല്യങ്ങളും വിശ്വാസ്യതകളും എന്തിന് മക്കളെപ്പോലും നമുക്കിന്ന് നഷ്ടപ്പെട്ടുകൊണ്ടിരിക്കുകയാണെന്നും ഗ്രന്ഥകാരൻ നിരീക്ഷിക്കുന്നുണ്ട്.

ജോൺ പോൾ പാപ്പ കുടുംബങ്ങൾക്കൊരെഴുത്ത് എന്ന തൻ്റെ പ്രബോധനത്തിൽ ഇരുട്ട് പരക്കാതിരിക്കാൻ ഒരു വീട് ശ്രദ്ധിക്കേണ്ട പ്രധാന കാര്യങ്ങളിലൊന്നായി കുടുംബ പ്രാർത്ഥനയെ വരച്ചുകാട്ടുന്നു.

"കുടുംബപ്രാർത്ഥനയ്ക്ക് ദൈവത്തോടു പലതും പറയുവാനുണ്ട്. മറ്റുള്ളവരോടും അതിന് ഏറെപ്പറയുവാനുണ്ട്..." വി.ജോൺ പോൾ പാപ്പ തുടരുന്നു

"പ്രാർത്ഥന ഓരോ കുടുംബത്തിന്റെയും അനുദിന ജീവിതത്തിലെ സ്ഥിരശീലമായിത്തീരണം. പ്രാർത്ഥന, കൃതജ്ഞ‌താ പ്രകടനമാണ്, ദൈവത്തെ സ്‌തുതിക്കലാണ്, ക്ഷമ ചോദിക്കലാണ്, യാചിക്കലും സഹായത്തിനായി വിളിച്ചപേക്ഷിക്കലുമാണ്. പ്രകാശം പരത്തുന്ന വീടുകൾക്ക് ഒരു പൊതു സ്വഭാവം കാണാനാകും. ആ വീടുകളെല്ലാം പ്രാർത്ഥനയുടെ വീടുകളാണ്.

പ്രഭാഷകൻ്റെ പുസ്തകത്തിലെ ഈ ശക്തമായ മുന്നറിയിപ്പ് നാം മുഖവിലക്കെടുത്തിട്ടുണ്ടോ? ദൈവഭക്‌തിയില്‍ ദൃഢതയും തീക്‌ഷ്‌ണതയും ഇല്ലാത്തവന്റെ ഭവനം അതിവേഗം നശിക്കും. പ്രഭാഷകന്‍ 27 : 3.

നമ്മുടെ ജീവിതത്തെ മുഴുവൻ പ്രകാശപൂർണ്ണമാക്കാൻ കെല്പുള്ളവനെ നമ്മൾ മറന്നു പോയാൽ സംഹാര ദൂതൻ നമ്മുടെ വീടിനകത്തും നാശം വിതക്കും.

ഒരുമിച്ച് പ്രാർത്ഥിക്കുന്ന കുടുംബം ഒരുമിച്ച് മുന്നേറുന്നു. വളരുന്നു.

ജോൺ പോൾ പാപ്പ പഠിപ്പിക്കുന്നു

1. പ്രാർത്ഥന, കൃതജ്ഞ‌താ പ്രകടനമാണ്

2. ദൈവത്തെ സ്‌തുതിക്കലാണ്

3. ക്ഷമ ചോദിക്കലാണ്, യാചിക്കലും സഹായത്തിനായി വിളിച്ചപേക്ഷിക്കലുമാണ്

നമുക്ക് കുടുംബ പ്രാർത്ഥന മുടക്കാതിരിക്കാം, അതിനെ വീണ്ടെടുക്കാം. എല്ലാ വീടുകളും പ്രകാശമുള്ളതാകട്ടെ